मौसम पूर्वानुमान : अझै तीन दिन वर्षा, गत २४ घण्टामा सबैभन्दा धेरै डडेलधुरामा २२० मिलिमिटर वर्षा (फाेटाे फिचर )

हाल देशका अधिकांश भूभागमा सामान्य बदली रही देशभर धेरै स्थानहरूमा हल्का देखि मध्यम वर्षा भएको जल तथा मौसम विज्ञान विभागले जनाएको छ । प्रदेश न १ र सुदूरपश्चिम प्रदेशका थोरै स्थानमा धारी वर्षा भएको छ ।

गत २४ घण्टामा सबैभन्दा धेरै वर्षा डडेलधुरामा २२० मिलिमिटर वर्षा भएको जल तथा मौसम विज्ञान विभागले जनाएको छ । यस्तै गरी दिपायलमा १८७ . ५ मिलिमिटर वर्षा भएको छ । धादिङका १४० मिलिमिटर वर्षा भएको छ भने घोराहीमा ९० . २ मिलिमिटर वर्षा भएको छ जल तथा मौसम विज्ञान विभागले जनाएको छ । गत २४ घण्टामा पोखरामा ६७ मिलिमिटर वर्षा भएको छ । 

जल तथा मौसम विज्ञान विभागका अनुसार आगामी कार्तिक ४ गते बिहीबार सम्म वर्षा हुने छ । बिहीबार दिउँसो प्रदेश न १, प्रदेश न २, बागमती प्रदेश, गण्डकी प्रदेश र लुम्बिनी प्रदेशमा सामान्य बदली रही सुदूरपश्चिम प्रदेश र कर्णाली प्रदेशमा आंशिक देखि सामान्य बदली रहने बताइएको छ । प्रदेश १, बागमती, गण्डकी र लुम्बिनी प्रदेशका केही स्थानहरूमा साथै बाँकी प्रदेशका थोरै स्थानहरूमा मेघगर्जन र चट्याङ्ग सहित हल्का वर्षाको सम्भावना रहेको छ । 

बिहीबार राति प्रदेश १, प्रदेश २, बागमती प्रदेश, गण्डकी प्रदेश र लुम्बिनी प्रदेशमा सामान्य बदली रही सुदूरपश्चिम प्रदेश र कर्णाली प्रदेशमा आंशिक बदली रहने बताइएको छ ।  बुधबार देशभर सामान्य देखि पूर्ण बदली रहने विभागले जनाएको छ । प्रदेश १, २, बागमती प्रदेश, गण्डकी प्रदेश र लुम्बिनी प्रदेशका धेरै स्थानहरूका साथै बाँकी प्रदेशका थोरै स्थानहरूमा मेघगर्जन र चट्याङ सहित हल्का देखि मध्यम वर्षाको सम्भावना रहेको बताइएको छ । 

देशका मध्य र पूर्वी उच्च पहाडी तथा हिमाली भूभागहरूका केही स्थानहरूमा हल्का देखि मध्यम हिमपात तथा पश्चिम उच्च पहाडी तथा हिमाली भूभागहरूमा हल्का हिमपातको समेत सम्भावना रहेको बताइएको छ । प्रदेश १, २, बागमती, गण्डकी र लुम्बिनी प्रदेशका एक दुई स्थानहरूमा भारी वर्षाको समेत सम्भावना रहेको विभागले जनाएको छ । 

धान थन्क्याउने बेला कार्तिक महिनामा परेकाे वर्षाकाे कारण देशभर किसानले भित्र्याउन ठिक्क परेकाे धानलाई क्षति पुगेकाे छ ।