सेती गण्डकी

धवल अन्नपूर्णाको हृदयोत्पन्न नारा ह‍ो सेती गण्डकी
अविचल अनि अक्षय आस्थाक‍ो भारा हो सेती गण्डकी
तिमी यस्को प्रवाहलाई अनादर गर्ने प्रयास नगर
युगौंयुगदेखिको सतत जीवनधारा ह‍ो सेती गण्डकी ।

अन्धविश्वास होइन सद् धर्म‍ोत्पन्न नारा हो सेती गण्डकी
मनुष्य जीवनका लागि अत्युक्तम भारा हो सेती गण्डकी
धरतीमा फुक्दै, गहिरिदै बग्नुको अर्थ बुझ्न सक्यो भने
चर्मचक्षुले पनि देखिन्छ, मातृ दुग्धधारा हो सेती गण्डकी ।

जन्मदेखि मृत्युसम्म समयोत्पन्न नारा हो सेती गण्डकी
कुन सृष्टिबाट अवतीर्ण दिब्य भारा ह‍ो सेती गण्डकी
हृदयको रक्तप्रवाह विना कहाँ जीवन चल्नसक्छ र
यस्तै यस कर्मभूमिको लागि अमृतधारा हो सेती गण्डकी ।

स्थावर–जङ्गमभित्र प्रेमोत्पन्न नारा हो सेती गण्डकी
विनाश हैन जीवन–सिर्जनाको भारा हो सेती गण्डकी
हिमाली करूणाको रसलाई डकैती नगर्नु कसैले
सौन्दर्य शक्तिको अनुपम प्रेमधारा हो सेती गण्डकी ।