रोकिएन मनसुन सकिएपछिको वर्षा : बिहीबार सम्म १ सय १ जनाको मृत्यु

मनसुन  सकिएपछि भइरहेको भारी वर्षा बिहीबार पनि रोकिएको छैन । बेमौसमी वर्षाको कारण सोमबारदेखि देशका विभिन्न स्थानमा आएको बाढी, पहिरो र डुबानमा परी बिहीबार दिउँसोसम्म १ सय १ जनाको मृत्यु भएको छ ।

बिहीबार साँझ पनि पोखरा लगायत देशका विभिन्न स्थान वर्षा भइरहेको छ । बाढी पहिरोमा परी प्रदेश नम्बर १ मा ६० जना, बागमती प्रदेशमा १ जना, कर्णाली प्रदेशमा ७ जना र सुदूरपश्चिम प्रदेशमा ३१ जना गरी १ सय १ जनाको मृत्यु भएको गृह मन्त्रालयले जनाएको छ । बाढी, पहिरोमा परी प्रदेश १ मा १९ जना, कर्णाली प्रदेशमा ४ जना र सुदूरपश्चिममा १७ जना गरी ४० जना घाइते भएको प्रहरीले बताएको छ ।

बाढी पहिरोमा परी विभिन्न स्थानमा गरी ४१ जना बेपत्ता भएका छन् । प्रदेश १ मा १३ जना, २ नम्बर प्रदेशमा १ जना, लुम्बिनी प्रदेशमा ३ जना, कर्णाली प्रदेशमा १ जना र सुदूरपश्चिम प्रदेशमा २३ जना गरी ४१ जना बेपत्ता भएका हुन् ।  बाढीको कारण २ हजार २ सय ३२ वटा घर डुबानमा परेका छन् । यस अवधिमा विपद्का घटनाबाट १ हजार १ सय ७७ वटा घर परिवार विस्थापित भएको प्रहरीले जनाएको छ । बाढी, पहिरोको कारण विभिन्न स्थानमा गरी १ सय ३९ वटा पशु चौपायाको मृत्यु भएको पनि प्रहरीले जनाएको छ ।