धरती जलेको छ,मान्छे ताराको खोजीमा

गुँडमा बचेरा छन् ,चरा चाराको खोजीमा
धरती जलेको छ, मान्छे ताराको खोजीमा

साँझपख अस्ताउनु अघि उदास छ घाम
फेरि उदाउनलाई अर्को सहाराको खोजीमा

जङ्गल पीठमा बोकेर बसेको यहाँ पहाड
तिर्खाले तप्त छ कुनै छहराको खोजीमा

वर्षौं देखि उभिएको उभियै छ यहाँ रुख
आफूसँग बेरिन आउने लहराको खोजीमा

बाँच्न सकिएन मान्छेको दुष्टताले गर्दा यहाँ
आकाश छ आत्महत्या गर्न पहराको खोजीमा