एक महिना देखि नीलगाई उद्धार गर्न हारगुहार गर्दा अझै भएन उद्धार

निजी कृषि फार्ममा एक महिना देखी पसेको नीलगाई उद्धार गर्न हारगुहार गर्दा अझै उद्धार हुन सकेको छैन ।

इटहरी उपमहानगरपालिका ४ आर्मी क्याम्प नजिकै स्थानीय मिफुङ लिम्बुको कृषि फार्ममा असार २२ गते देखि नीलगाई पसेर फलफूलका बिरुवा, तरकारी नष्ट गरेको छ । नीलगाई फार्ममा पसेपछि  उद्धार गर्न स्थानीय उपमहानगरपालिका, वन कार्यालयमा हारगुहार गर्दा पनि उद्धार नभएको लिम्बुले बताएका छन् । आफ्नो साढे ४ निगाह कृषि फार्ममा नीलगाई देखिएपछि स्थानीय वन कार्यालय, प्रहरी कार्यालय  लगायतमा खबर गर्दा पनि उद्धार नभएको उनले बताए ।

वन्यजन्तु संरक्षण गर्नु पर्छ भन्ने उद्देश्यले बेलैमा वन कार्यालय, प्रहरी कार्यालय र वडा कार्यालयमा खबर गरे पनि आज सम्म उद्धार नभएको लिम्बुले बताए । प्रहरी र वन कार्यालय कर्मचारी आएर नीलगाई हेरेर गए पनि अझै उद्धार गरेका छैनन् । बस्तीमा वन्यजन्तु देखापरेपछि स्थानीयले केही गर्लान् भन्ने डरले पटक पटक उद्धार गर्न सम्बन्धित निकायलाई खबर गर्दा पनि संरक्षणमा चासो नदेखाएको स्थानीयको गुनासो छ । 

नीलगाईको बारेमा जानकारी पाएपछि एक टोली सहित उद्धार गर्न गए पनि गाई ठुलो भएकोले समात्नै नसकिएको तरहरा सब डिभिजन वन कार्यालय इटहरीका सहायक वन अधिकृत अवदेशकुमार गच्छेदारले बताए । आफ्नो कार्यालयमा दक्ष जनशक्ति र प्राविधिक टोली नभएकोले उद्धार गर्न नसकेको उनले सुनाए । 

नीलगाईको उद्धार गर्न कोशीटप्पु वन्यजन्तु आरक्षणमा खबर गरेको उनले बताए । त्यस क्षेत्र नजिकै रहेको सरस्वती सामुदायिक वन हुँदै नीलगाई पहिले पनि आउने रहेछ उनले भने । नीलगाई उद्धार गर्न डिभिजन वन कार्यालय र कोशीटप्पु वन्यजन्तु आरक्षणमा कुरा भइरहेको उनले बताए । नीलगाई भारतीय उपमहाद्वीपमा सबैभन्दा ठुलो एन्टिलोप प्रजाति हो ।

यसको शरीरको बनावट घोडासँग बढी मिल्दोजुल्दो हुन्छ । वयस्क भालेको शरीरको रङ्ग नीलो खैरो हुन्छ भने पोथी तथा बाच्छाहरूको शरीरको रङ्ग हल्का खैरो हुन्छ । राष्ट्रिय निकुञ्ज तथा वन्यजन्तु संरक्षण ऐन २०२९ को उपदफा ३ बमोजिम नीलगाईलाई हानी नोक्सानी गरे राष्ट्रिय निकुञ्ज भित्र भए २० हजार देखि ५० हजार जरिवाना वा ६ महिना देखि १ वर्ष सम्म कैद वा दुवै हुन सक्ने छ। निकुञ्ज बाहिरको हकमा २० हजार सम्म जरिवाना, ६ महिना सम्म कैद वा दुवै हुन सक्ने व्यवस्था छ ।