पाेखरामा असाेज १ देखि लकडाउन हट्दै : रात्रिकलीन व्यवसाय पनि खुल्दै

पोखरा : कास्कीमा  जारी लकडाउन असाेज १ गते देखि हट्ने भएकाे छ । कोरोना सङ्क्रमण नियन्त्रण गर्न दोस्रो पटक वैशाख १५ देखि लगाइएको निषेधाज्ञा असोज १ गते देखि हट्ने भएकाे हो ।  लकडाउन खुले सँगै अब शैक्षिक संस्था देखि सबै खाले व्यवसाय खुला हुने छन् ।  यस अघि लकडाउन खुले पनि स्कुल, रात्रीकालिन व्यवसाय क्लब, दोहोरी साँझ, डान्सबार भने खुलेका थिएनन् ।

असोज १ गते देखि सबै खाले व्यवसाय खुलाउने निर्णय गरेको कास्कीका प्रमुख जिल्ला अधिकारी थानेश्वर गौतमले बताए । लामो समय लकडाउनको मारमा परेको पर्यटन व्यवसाय लकडाउन खुले सँगै पर्यटन व्यवसाय लयमा फर्कने विश्वासमा छन् । पछिल्लो दिनमा कोरोना सङ्क्रमण र मृत्युदर घटेको कारण लकडाउन खुला गर्ने निर्णय गरिएको कास्की प्रशासनले जनाएको छ । प्रमुख जिल्ला अधिकारी गौतमले बुधबार साँझ जारी गरेको आदेशमा स्वास्थ्य सतर्कता अपनाएर सुरक्षा मापदण्ड पूर्ण रूपमा पालना गर्नुपर्ने उल्लेख गरिएको छ । 

यसअघि साँझ ८ बजेसम्म मात्र खुला गरिएको बजार र पर्यटकीय स्थलको समय बढाइएको छ । पोखराका होटेल तथा रेष्टुरेण्ट राति साढे ११ बजेसम्म  खोल्न पाइने उल्लेख गरिएको छ । डान्सबार, क्लब, दोहोरी साँझ जस्ता रात्रिकालीन व्यवसाय राति साढे १ बजे सम्म सञ्चालन गर्न पाइने आदेशमा उल्लेख छ । लकडाउन खुला गरिएपनि सङ्क्रमण दर बढ्दै गएमा जुनसुकै बेला थप आदेश जारी गर्ने जिल्ला प्रशासन कार्यालय कास्कीद्वारा जारी आदेशमा उल्लेख गरिएको छ । 

लामो समय भएको लकडाउनको कारण सबैभन्दा धेरै मारमा परेको पर्यटन उद्योग लकडाउन हटे सँगै लयमा फर्कने विश्वास व्यवसायीमा छ । लकडाउन खुले सँगै अव आन्तरिक पर्यटन प्रवर्द्धन गर्ने कार्यक्रम सुरु गर्दै छुटका कार्यक्रम घोषणा गर्ने तयारीमा पोखराका पर्यटन व्यवसायीले बताएका छन् । आन्तरिक पर्यटकलाई लक्षित गर्दै छुटका प्याकेज घोषणको तयारीमा पोखराका पर्यटन व्यवसायी रहेको पोखरा पर्यटन परिषद्का उपाध्यक्ष पोमनारायण श्रेष्ठले बताए ।