बाघ संरक्षणमा चुनौती : पासोमा परेको अवस्थामा मृत भेटियो पाटे बाघ

टीकारपुर :अमरावती सामुदायिक वनमा पासोमा परेको अवस्थामा पाटे बाघ मृत भेटिएको छ । कैलालीको जानकी गाउँपालिका  स्थित अमरावती सामुदायिक वनमा पाटे बाघ मृत भेटिएको हो ।

आइतबार पासोमा परेको अवस्थामा बाघ मृत भेटेपछि स्थानीयले प्रहरीलाई खबर गरेका थिए । सामुदायिक वन भित्र थापेको काँडेतारको पासोमा परेर मरेको अवस्थामा बाघ भेटिएको डिभिजन वन कार्यालय लम्कीले जनाएको छ । मृत भेटिएको झण्डै १७/१८ वर्ष उमेरको पोथी पाटेबाघ रहेको बताइएको छ ।

घट्नाको प्रकृति हेर्दा केही दिन अघि देखि नै काँडेतारको पासो बाघको घाँटीमा परेकोले बाघ मरेको हुन सक्ने बताइएको छ । विश्वमै दुर्लभ हुँदै गएका पाटे बाघ मृत भेटिनुले संरक्षण कर्मी चिन्तित छन् ।  राष्ट्रिय निकुञ्ज र चुरे क्षेत्रका वनसँग सीमाना जोडिएका क्षेत्रमा बाघ लगायत वन्यजन्तु ओहोरदोहोर गर्ने भएकोले ति क्षेत्रमा वन्यजन्तुको चोरी शिकारी हुन सक्ने तर्फ निकुञ्ज, डिभिजन वन कार्यालय, स्थानीय सरकार सचेत हुन पर्ने संरक्षण सुझाव छ ।