नसर्ने रोगहरूको पहिचानकालागि एक महिने अभियान सुरु

पोखरा : नसर्ने रोगहरूको पहिचानकालागि बिहीबार देखि पोखरामा एक महिना अभियान सुरु भएको छ । पोखराको सहरी स्वास्थ्य प्रवर्द्धन केन्द्र नयाँ बजारमा स्वास्थ्य तथा जनसंख्यामन्त्री मन्त्री प्रदिप पौडेलको रक्तचाप परिक्षण र  रगत परिक्षण गरेर सुरु भएको हो ।  

कार्यक्रममा बोल्दै मन्त्री पौडेलले जनतालाई रोगी बन्न नदिने रणनीति तय गर्न रोग जटील हुनु अगावै रोग पत्ता लगाएर निदान गर्न यो अभियान देशै भर सुरु गरिएको बताए । उनले जनतालाई रोगी बन्न नदिने रणनीति तय गर्न थप आवश्यक रहेको पनि उनले बताए । निरोधात्मक क्षेत्रको कामलाई प्रभावकारी बनाउन यो अभियान सुरु गरिएको पनि उनले बताए ।

मधुमेह, उच्च रक्तचाप आदिका कारण धेरै स्वास्थ्य समस्या आउने बताउँदै ती समस्याको सुरुमै पहिचान भएका अन्य रोग निम्तन नसक्ने पनि उनले बताए । यसैकालागि यो अभियान सुरु गरिएको उनले सुनाए । यो अभियान सफल बनाउन देशभरका वडा कार्यालय देखि सबै निकाय लाग्नु पर्नेमा उनले जोड दिए । यो अभियान ३० वर्ष माथिका १ करोड ४० लाख नागरिकको रोगका पहिचान आवश्यक भएको पनि उनले बताए । यस अभियानकालागि तीनवटै तहका सरकार बीच समन्वय आवश्यक हुने र फागुन महिनाभर यो अभियान सञ्चलन हुने बताइएको छ ।

यो अभियान प्रत्येक वर्ष फागुन महिनामा सञ्चालन गरिने पनि मन्त्री पौडेलले बताए । कार्यक्रममा पोखरा महानगरपालिकाका प्रवक्ता मोति तिमिल्सिनाले पोखरा महानगरपालिकाको गत वर्षको तथ्याङ्क हेर्दा उच्च रक्तचापका बिरामी सबैभन्दा धेरै देखिएको र त्यसपछि मधुमेह रहेको जानकारी दिए । नसर्ने रोगको पहिचान गरी उपचारको दायरामा ल्याएर यसबाट हुने मृत्यु घटाउन यो कार्यक्रम आएकोले सबै नागरिकले बेलैमा स्वास्थ्य परिक्षण गर्न अनुरोध गरे । पोखरा ८ का वडा अध्यक्ष रुद्रनाथ बरालले नसर्ने रोगका पहिचानमा यो अभियान महत्त्वपूर्ण हुने विश्वास व्यक्त गरे ।