कोरोना सङ्कटमा तयार भएका पोखराका नयाँ पर्यटकीय गन्तव्य: फेवा किनारमा केबलकार र विशाल शिव मूर्ति

पर्यटनको राजधानी पोखरामा कोरोना सङ्क्रमणकै बिच नयाँ दुई पर्यटकीय गन्तव्य तयार भएका छन् । पोखराको पुम्दीकोटमा ५१ फिट उचाइको विशाल महादेवको मूर्ति जडान भइसकेको छ । 

यसै गरी पोखराको फेवाताल किनार सदीबेगरबाट ताल, हिमाल र पोखरा बजारको अवलोकन गर्दै सराङकोट जाने केवल कार पनि तयार भइसकेको छ ।

महादेवको मूर्ति जडान भए पनि रंगरोगन र बाँकी संरचना तयार हुँदै गर्दा आन्तरिक पर्यटकको घुइँचो लाग्न सुरु भइसकेको छ । महादेवको मूर्ति रहेको पुम्दीकोट परिसरबाट अन्नपूर्ण, धौलागिरि, माछापुच्छ्रे सहित विभिन्न हिमाली दृश्य, फेवाताल र पोखरा बजार देख्न सकिन्छ । 

केवल कार करिब २ अर्ब लगानीमा निर्माण सम्पन्न भएको अन्नपूर्ण केवल कार प्रालिका निर्देशक तीर्थराज त्रिपाठीले जानकारी दिएका छन् । दसैँ र तिहारको बिचमा केबलकार सञ्चालन गर्ने गरी तयारी अवस्थामा रहेको त्रिपाठीले बताए । 

विशाल शिव मूर्ति ४० करोडमा निर्माण हुन लागेको हो । निर्माणको काम ५० प्रतिशत सकिएको निर्माण समितिका संयोजक चन्द्रकान्त बरालले जानकारी दिएका छन् ।

धार्मिक पर्यटकीय क्षेत्रका रूपमा पुम्दीकोट विश्व पर्यटन बजारमा नयाँ प्रडक्टको  रूपमा विकास हुने विश्वास गरिएको छ । अन्नपूर्ण माछापुच्छ्रेको काखमा ध्यानमा शिव भगवान् बसे जस्तै गरी मूर्ति जडान गरिएको छ । यसैको कारण पनि नेपालीको साथै भारतीय धार्मिक पर्यटकमाझ निकै आकर्षणको केन्द्र बन्ने विश्वास गरिएको छ ।