कोरोना सङ्क्रमणबाट गण्डकीमा २१ दिनमा १०३ जनाको मृत्यु

कोरोना सङ्क्रमण नियन्त्रण गर्न लगाइएको लकडाउन खुकुलो हुँदै गएपछि गण्डकी प्रदेशमा दैनिक कोरोना सङ्क्रमण दर बढ्दै गएको छ । गण्डकी प्रदेशमा साउन महिना २१ गते सम्म मात्र १०३ जनाको कोरोना सङ्क्रमणका कारण मृत्यु भएको स्वास्थ्य निर्देशनालय गण्डकी प्रदेश पोखराले जनाएको छ । 

स्वास्थ्य निर्देशनालय गण्डकी प्रदेशले बिहीबार दिउँसो प्रकाशित गत २४ घण्टाको कोभिड १९ सम्बन्धी गण्डकी प्रदेशको अद्यावधिक विवरण अनुसार प्रदेशमा कोरोना सङ्क्रमणबाट ९ जनाको मृत्यु भएको छ । २४ घण्टामा १२ सय ६२ जनामा गरिएको कोरोना परीक्षणमा गण्डकी प्रदेशमा ६ सय १६ जनामा कोरोना सङ्क्रमण पुष्टि भएको छ । प्रदेशमा ५ हजार ५ सय ३३ जना होमआइसोलेसनमा रहेका छन् । गण्डकी प्रदेशमा अहिले सम्म कोरोना सङ्क्रमणबाट मृत्यु हुनेको कुल सङ्ख्या १ हजार १ सय १८ जना रहेको छ ।