फेवा किनारमा आरती सौन्दर्य

 फेवाताल किनारमा साँझपख दैनिक हुने आरतीले पर्यटकका लागि थप आकर्षण बढाएको छ। फेवा किनारमा साँझ पख थप साैन्दर्य थपेकाे छ । फेवातालको मध्यभागमा रहेको तालबाराही मन्दिरको अघिल्तिर बाराहीघाटमा आरती अवलोकन गरेर पर्यटकहरुले आनन्द लिने गरेका छन्। २०७५ असोज २४ गते घटस्थापनादेखि फेवा किनारमा आरती सुरु हुँदै आएको हो। 

कोरोना संक्रमण नियन्त्रण गर्न सरकारले लकडाउन लगाउनु अघि चैत ८ गतेदेखि आरती सेवा बन्द रहेको थियो। पुसको ७ गतेदेखि पून: आरती नियमित हुँदै आएको छ। फेवाताल किनारमा साँझखप माछापुच्र्छे, धौलागिरी, अन्नपूर्ण हिमालको अवलोकन गर्दै आरती हेर्न पर्यटक निकै लोभिने गरेको माता तालबाराही आरती सेवा समितिका अध्यक्ष गिरीराज अधिकारीले बताए। 

भारतीय पर्यटक विशेष गरी बढी आकर्षीत हुने गरेको उनले सुनाए। पर्यटकहरु तालको किनारमा हुने आरती हेर्नकै लागि बसाई अवधि बढाएर अवलोकन गर्ने गरेको पनि उनले बताए। कोरोना संक्रमण नियन्त्रण गर्न सरकारले अझै पनि भारतीय नाका खुला नगर्दा भारतीय पर्यटक आउन पाएका छैनन्। पोखरा घुम्न आएका आन्तरिक पर्यटहरु आरती कार्यक्रममा सहभागी हुने गरेको समितिका अध्यक्ष अधिकारीले बताए। 

हरेक साँझ शंखध्वनिका साथ आरती सुरु हुँदा पर्यटक आरती स्थल अघिको कुर्सीमा बसेर मन्त्रमुग्ध भएर सहभागी हुन्छन्। स्तोत्र पाठसहित सुगन्धित धुप बालेर ४५ मिनेटसम्म आरती हुन्छ। आन्तरिक पर्यटक मात्र होइन अहिले पनि पोखरामा रहेका विदेशी पर्यटक आरतीमा सहभागी हुने गरेका छन्। आरतीमा कर्ता बस्न चाहनेलाई निश्चित शुल्क दिएर बस्ने व्यवस्था मिलाइएको छ। सोही शुल्क र उपस्थित भक्तजनको दानबाट दैनिक आरती हुँदै आएको हो। 

तीन जना गुरुले कलाकौशलसहित तालवाराही मन्दिर अघि फेवाताललाई पृष्ठमूमीमा पारेर आरती गर्दछन्। त्यस क्रममा शिव ताण्डव नृत्य पनि देखाइन्छ। भजनकिर्तन, टीका र प्रसाद ग्रहण पनि हुन्छ। कोरोना अघि पशुपतिनाथको दर्शन गरेर मुक्तिनाथ जान पोखरा आएका भारतीय तीर्थालु यहाँको आरतीमा सहभागी हुने गर्दथे। पश्चिमाञ्चल होटल संघले यस अघि नै सुरक्षित मापदण्ड अपनाएर भारततर्फका सबै नाकाबाट निर्वाध रुपमा पर्यटक आउने वातावरण सरकराले मिलाउनु पर्ने बताउँदै आएपनि सुनुवाई भएको छैन।