सीता एयरको जहाज बँदेलका पाठासँग ठोक्कियो : तीन वटा बँदेलकापाठा मरे

सीता एयरको जहाज नेपालगन्ज विमानस्थलको धावनमार्गमा मंगलबार बँदेलसँग ठोक्किएर दुर्घटना भएको छ । जहाज बँदेलका पाठासँग ठोक्किँदा तीन वटा बँदेलका पाठा मरेका बाँके प्रहरी प्रमुख एसपी श्यामकृष्ण अधिकारीले बताए ।

नेपालगन्जबाट हुम्लाको सिमिकोट उड्ने क्रममा बिहान साढे ६ बवेतिर बँदेलका तीन वटा पाठा विमानमा ठोक्किएका हुन् । विमान चालक दलका ३ सदस्य र १४ यात्री भने सबै सकुशल रहेको सीता एयरले जनाएको छ । बँदेलसँग ठोक्किँदा जहाजको अगाडीको टायरभन्दा माथिल्लो भागमा क्षति पुगेको छ । बँदेलसँग जहाज ठोक्किएपछि मंगलबारका लागि हुम्लाको उडान रद्द गरिएको छ ।

दुर्घटनाको कारण नेपालगन्ज विमानस्थलको उडान झन्डै डेढ घण्टा प्रभावित भएको प्रहरीले जनाएको छ । यस अघि पनि नेपालगन्ज विमानस्थलमा बँदेल, दुम्सी ठोक्किएको थियो । विमानस्थल छेउमा रहेका झाडीको कारण यो समस्या हुँदै आएको स्थानीयले बताएका छन् ।