बाघले फेरि लियो एकको ज्यान : त्रासमा सर्वसाधारण

बाँकेमा बाघको आक्रमणबाट फेरि एक जनाको ज्यान गएको छ । राप्ती सोनारी गाउँपालिका वडा नं ६ हवल्दारपुरकी ३२ वर्षीया चाँदनी थारुको पाटे बाघको आक्रमणबाट ज्यान गएको प्रहरीले जनाएको छ । माघीको लागि पात टिप्न भनेर बाँके राष्ट्रिय नजिकैको सामुदायिक वनमा पात टिप्न गएकी थारुको बाघले अक्रमण गरी ज्यान लिएको हो ।

माघीकालागि पात टिप्न गएका ६÷७ जनाको समूहमा बाघले थारुलाई झम्टिएर मारेको प्रहरीले बताएका छन् । बाघले आक्रमण गरेर मृत्यु भएकी थारुको शव जंगलमा भेटिएको छ । समूहमा रहेकी थारुलाई बाघले झम्टिएर लगेपछि अन्यले भागेर ज्यान जोगाउन सफल भएका छन् । दुई दिन अघि पनि बाघको आक्रमणबाट घाँस काट्न गएकी राप्ती सोनारीकी ५३ वर्षीय लिला विष्टको बाघको आक्रमणबाट ज्यान गएको थियो । शुक्रबार राप्ती सोनारीका बलबादुर पुन बाघको आक्रमणबाट जोगिएका थिए ।

राप्ती सोनारीमा भदौयता चार सर्वसाधारणको बाघको आक्रमणबाट ज्यान गएको छ । बाघले एक पछि अर्को गर्दै मान्छेलाई आक्रमण गर्न थालेपछि सर्वसाधारण त्रसित छन् । नरभंक्षी बाघ नियन्त्रण गर्न निकुञ्जको प्रयास विफल भएको छ भने स्थानीयले बाघ नियन्त्रणमा लिन माग गरेका छन् ।