राष्ट्रिय कृषि गणना सुरु

कृषि गणनाको सार कृषि योजनाको पूर्वाधार नाराका साथ कृषिप्रधान मुलुक नेपालमा कृषि गणना सुरु भएको छ । कृषिले अर्थतन्त्रमा गरिरहेको योगदानलाई तथ्यांकमा देखाउन गणना सुरु भएको हो ।

कृषि गणनामा नेपालका प्रत्येक जिल्लाको कृषि संरचना, गतिविधि तथा कृषि उत्पादनसँग सम्बन्धी विवरण संकलन गरिने छ । राष्ट्रिय जनगणना सकिएको ६ महिनापछि राष्ट्रिय कृषि गणना सुरु भएको हो । मंगलबार देखि ४५ दिनसम्म फिल्डमा खटिएर गणकले तथ्यांक संकलन गर्ने छन् ।
कृषि गणनाका लागि देशभर गणक र सुपरिवेक्षक गरि ६ हजार ४ सय ६३ जना फिल्डमा खटिएका छन् ।

राष्ट्रिय गणना र कृषि गणना हरेक दश दश वर्षमा हुँने गर्दछ । नेपालमा पहिलो पटक २०१८ सालमा कृषि गणना गरिएको थियो । त्यसैलाई निरन्तरता दिन राष्ट्रिय गणना सकिएको ६ महिनापछि राष्ट्रिय कृषि गणना हरेक दश दश वर्षमा हुँने गर्दछ । कृषि गणनामा लिइएका व्यक्तिगत विवरण गोप्य राखि तथ्यांक सार्वजनिक गर्ने बताइएको छ । कृषि गणना १९ जेठ सम्म चल्ने विभागले जनाएको छ । विभागका अनुसार देशभरका साढे ३ लाख घर परिवारलाई प्रतिनिधिमुलक घरका रुपमा छानेर विवरण लिइने छ ।

त्यसरी प्राप्त हुने तथ्यांकलाई औसतमा निकालेर तथ्यांक विश्लेषण गरिने बताइएको छ । विभागका अनुसार जनगणनामा करीव ४१ लाख कृषक परिवारको सूचिकृत भएको छ । कृषि गणनामा जनगणनाबाट प्राप्त कृषक परिवारबाट छानिएका ३ लाख ५० हजार परिवारमा पुगेर गणकले फारम भराउने बताइएको छ । यसरी गणना गरिदा महिलाको सहभागितासम्बन्धी छुट्टै विवरण आउने छ । नेपालको कृषि प्रणालीमा महिलाको बढ्दो सहभागितालाई ध्यानमा राखी महिलाको अगुवाईमा भइरहेका खेतिपातीको विवरण कृषि गणनामा संकलन गरिने बताईको छ ।