जंगलमा फ्याँकिएका प्लास्टिकबाट हस्तकलाका सामग्री

जंगलमा जथाभाबी फ्याँकिएका प्लास्टिक जन्य फोहोर संकलन गरेर कास्कीको मादी गाउँपालिका ताङतिङमा घुम्न आउने पर्यटककालागि कोसेली  दिन हस्तकलाका सामाग्री बनाउन सुरु भएको छ ।

अन्नपूर्ण संरक्षण क्षेत्र भित्र पर्ने कास्कीको मादी गाउँपालिका वडा नं ४ ताङतिङमा प्रकृतिका साथीहरू नामक संस्थाले वन्यजन्तु, जैविक विविधतालाई असर पर्ने वनमा फ्याँकिएका प्लास्टिक जन्य फोहोर संकलन गरी हस्तकलाका सामाग्री बनाउने ९ दिने तालिम दिएको हो ।

ताङतिङको जंगलमा वन कुकुर, ध्वाँसे चितुवा, मृग, घोरल, हिमाली कालो भालु, लंगुर, बँदेल लगायतका जंगली जनावर पाइन्छन् । जंगल तथा बस्ती नजिकबाट संकलन गरेर ल्याइएका प्लास्टिक जन्य सामान राम्रो सँग धोइपखाली हस्तकलाका सामाग्री बनाइएको हो । यसरी बनाइएका हस्तकलाका सामाग्री ताङतिङ घुम्न आउने पर्यटकलाई कोसेलीको रुपमा बिक्री गरिने गरी गाउँमै कोसेली घर पनि बनाइने संरक्षण क्षेत्र व्यवस्थापन समितिका अध्यक्ष गुमानसिंह गुरुङले बताए । कोसेली घरमा हस्तकलाका सामाग्री मात्र होइन गाउँमा उत्पादन हुने अन्न, सागपात, लगायतका उत्पादन पनि राखिने प्रकृतिका साथीहरू नामक संस्थाका अधिकृत सुदर्शन पराजुलीले बताए ।

तालिममा ताङ्तिङका १५ जना स्थानीय महिलाहरूको सहभागिता रहेको छ । स्थानीयको सहभागितामा प्रकृतिका साथीहरू संस्थाले २५० केजी प्लास्टिक जन्य फोहोर संकलन गरेको थियो । तिनै प्लास्टिक धोइपखाली हस्तकलाका सामाग्री बनाइएको हो । तालिम अवधिभर प्रशिक्षार्थीहरूले ढकिया, चिया पोस्टर, पेन होल्डर, चकटी, गुन्द्री, सपिङ ब्याग, पर्स जस्ता सामाग्री बनाएका छन् । होटेल तथा होमस्टे व्यवसायमा आबद्ध नरहेका, कमजोर आर्थिक अवस्था भएका समुदायकाका महिलाहरूलाई प्राथमिकता राखेर तालिम दिइएको हो ।

ताङतिङ क्षेत्र वरपर दुर्लभ वन्यजन्तु वन कुकुर, लगायत वन्यजन्तुको वासस्थान सुधार गर्ने, पर्यटन प्रवर्धन गर्ने उद्देश्यले प्रकृतिका साथीहरू संस्थाले स्थानीय सरकार तथा संरक्षण क्षेत्र व्यवस्थापन समितिसँग समन्वय गरेर कार्यक्रम आयोजना गर्दै आएको छ । उक्त परियोजना युरोपियन आउटडोर कन्जरभेसन एसोसिएसनको सहयोगमा सञ्चालन भइरहेको छ । यस अघि संस्थाले स्थानीय युवाहरूलाई ५ दिने पर्यटक पथप्रदर्शक तालिम पनि दिएको थियो ।