काेराेना कहर: एकैदिनमा ५५ जनाको मृत्यु

पाेखरा : कोरोना भाइरस संक्रमण र मृत्युकाे ग्राफ निरन्तर डरलाग्दो गरी उकालो लागेको छ । वैशाख २१ गते मंगलबार एकै दिन ५५ जनाको कोरोना संक्रमणबाट मृत्यु भएको स्वास्थ्य तथा जनसंख्या मन्त्रालयले जनाएको छ । यो अहिलेसम्म पुष्टि भएको एकै दिनमा धेरै मृत्युको सङ्ख्या हो।

सरकारले सोमबार प्रकाशित गरेको विवरण अनुसार थप ७,४४८ जनामा काेराेना संक्रमण र ३७ जनाको मृत्यु भएको थियो । यसै गरी आइतबार २७ जनाको मृत्यु भएको थियो । यसरी कोरोना संक्रमण र मृत्युको संख्या डरलाग्दाे गरी निरन्तर उकालो लागेको हाे । वैशाख महिनाको २१ दिनमा मात्र ३५९ जनाको कोरोना संक्रमणबाट मृत्यु भएको छ । स्वास्थ्य तथा जनसंख्या मन्त्रालयको तथ्यांक अनुसार हालसम्म नेपालमा कोरोना संक्रमणबाट मृत्यु हुनेको संख्या ३४१७ पुगेको छ । दोस्रो लहर सुरु संगै वैशाख २१ गते सम्म मात्र ६९ हजार ४४१ जना नयाँ संक्रमित थपिएका छन् ।

कोरोना सँग मिल्दोजुल्दो लक्षण देखिंदा पनि परीक्षण नगरी घरमै बस्ने र जटील भएपछि मात्र अस्पताल आउने गरेका कारण उपचारमा ढिलाइ हुन पुग्दा मृत्युको संख्या बढेको उपचारमा संलग्न डाक्टरले बताएका छन् । भारत अहिले कोरोनाभाइरस महामारीबाट नराम्री प्रभावित भएको छ। अहिलेसम्म भारतमा सङ्क्रमितको कुल सङ्ख्या दुई करोड नाघेको छ। छिमेकी देश भारतमा काेराेना भाइरसकाे माहामारी पछि नेपालमा पनि पछिल्लाे समयमा काेराेना भाइरस फैलिदै गएकाे छ । काेराेना भाइरसकाे संक्रमण बढ्दै गएपछि नियन्त्रण गर्न संक्रमण बढी भएका जिल्लामा कडा खालकाे निषेधाज्ञा गरिएकाे छ ।