पाेखराकाे फेवाताल किनारमा छठ पर्व

दसैं र तिहार पर्व नेपालीले मनाए संगै अर्को पर्व छठ सुरु भएको छ । सोमबारदेखि छठ पर्व सुरु भएको हो । सत्य र अहिंसा प्रति मानवको रुचि बढाउने, सबै जीवप्रति सहानुभूति राख्न अभिप्रेरित गर्ने पर्वको रुपमा छठ पर्वलाई लिइन्छ ।

तराईमा धुमधामका साथ छठ पर्व मनाइन्छ । कात्तिक शुक्लपक्षमा चार दिन सम्म मनाइने छठ पर्वको पहिलो दिनलाई ‘नहाए खाएके दिन’ पनि भन्ने गरिन्छ । छठको पहिलो दिन छठका व्रतादुहरुले खोला, नाला, नदी, पोखरी, तलाउलगायतका जलाशयमा नुहाइधुवाइ गरेर शुद्ध भइ लसुन, प्याज नभएको शाकाहारी खाना खाने गर्दछन् ।

दोस्रो दिनलाई खरना भनिन्छ । खरनाको दिनदेखि नै व्रतालुहरुले निराहार व्रत सुरु गर्छन् । छठको तेस्रो दिन षष्ठी तिथी छठको मुख्य दिन मानिन्छ । त्यस दिन ब्रतालु महिलाले नदी, पोखरी, तलाउलगायतका जलाशयमा तयार पारिएको छठघाटमा पुगेर साँझ पख अस्ताउँदो सूर्यलाई र भोलिपल्ट सप्तमी तिथीका दिन बिहान उदाउँदो सूर्यलाई अर्घ दिएर पूजापाठ गरेपछि छठ पर्व विधिवनरुपमा समापन हुन्छ ।

पोखरामा पनि पछिल्लो समयमा छठ पर्व मनाउन थालिएको छ । पोखरामा बस्ने तराईका नेपाली दाजुभाई र भारतीयले यहाँ छठ पर्व मनाउछन् । अनुशरण गर्दै पोखरेलीले पनि पछिल्लो समयमा छठ पर्व मनाउन थालेका छन् । पोखराको फेवाताल किनार, सेती नदीमा छठ पर्व मनाइन्छ । पाेखराकाे केदारेश्वर मन्दिर नजिकै फेवाताल किनार छठ पूजाकालागि झकिझकाउ बनाइन्छ ।