वर्षा याममा यस्ता रोगहरूको हुन्छ उच्च जोखिम

पोखरा : मनसुन सुरु भएको छ । वर्षा याममा प्राकृतिक विपद्को जोखिम मात्र होइन मनसुनमा विभिन्न रोगहरूको उच्च जोखिम पनि हुन्छ ।मनसुनमा सबैभन्दा धेरै झाडापखाला, हैजा, डेंगु, टाइफाइड, भाइरल, जन्डिस, हेपाटाइटिस ए र ई, आउँ, निमोनिया, औलो, कालाजार, ज्वरो, स्क्रब, टाइफाइड, रुघाखोकी हुने डा थानेश्वर पहारी बताउँछन् ।

यस्तै गरी छालाको समस्या, पेटको संङ्मण, जुका, आँखा पाक्ने, लेप्टोस्पाइरोसिसजस्ता बिरामी हुने उनले बताए । वर्षा याममा दूषित खाना र पानीका कारण विभिन्न रोग लाग्ने गर्दछ । लामखुट्टे, झि«ङ्गा, फोहोरका कारण सङ्क्रमण हुने गर्दछ । वर्षा याममा हुने बाढी पहिरोका कारण पानी प्रदूषण हुन्छ । प्रदूषित पानी सेवन गर्दा जन्डिस लगायतका रोगहरूका कारण मानिसहरू बिरामी पर्ने गर्दछन् । यसैले वर्षा याममा खानपानमा बढी सचेत हुनु पर्ने चिकित्सहरु बताउँछन् । 

गर्मी मौसम भएकोले यो समयमा विषालु सर्पले टोक्ने र समयमै उपचार नगरे मृत्यु पनि हुन्छ । गर्मी मौसममा शरिरबाट बढी पसिना जाँने भएकोले पानीको अभावको कारण जल वियोजन, पिसाब र मिगौलाको समस्या हुने चिकित्सकले बताएका छन् । यस मौसममा हुने सरुवा रोगहरू केही श्वासप्रश्वास र पाचन प्रणालीसँग सम्बन्धित रोग पनि लाग्ने गर्दछ । वर्षा याममा पानीजन्य रोगहरू लाग्ने गर्दछ । झाडापखाला, हैजाको साथसाथै रगतमासी, जुका, पोलियो, जियारडियासिस, अमिवियासिस, आउँ लगायतका रोगहरू लाग्न सक्छन् ।

यो मौसममा काँचो र नपाकेका मासु, बासी खाना खान हुँदैन । खाना पचाउन नसकिने गरी बढी खाने, बढी चिल्लो खाद्य पदार्थ पनि खान हुँदैन । फोहोर खानेकुरा खादा भिब्रियो कोलेरा ब्याक्टेरियाले आन्द्रामा सङ्क्रमण गर्ने भएकोले यस तर्फ पनि बेलैमा ध्यान दिनु पर्ने चिकित्सकको सुझाव छ ।