कोरोना त्रास : ९ देशबाट आउने यात्रुलाई नेपाल प्रवेशमा रोक

कोरोना भाइरसको नयाँ भेरियन्ट ओमिक्रोनको जोखिम बढेपछि सरकारले ९ वटा देशबाट आउने यात्रुलाई नेपाल प्रवेशमा रोक लगाएको छ । मन्त्रिपरिषद्को बैठकले दक्षिण अफ्रिका, बोत्स्वाना, जिम्बाबे, नामिबिया, इसबाटिनी, मोजाम्बिक, मलावी र हङकङबाट आउने यात्रुहरुलाई नेपाल प्रवेशमा रोक लगाएको प्रधामन्त्रीको सचिवालयले जनाएको छ ।

सचिवालयका एक सदस्यका अनुसार शुक्रबार रातिदेखि लागू हुनेगरी ती देशलाई ट्रान्जिट बनाएर आउने र तीन हप्ताभित्र ती मुलुकको भ्रमण गरी आउनेहरुलाई समेत नेपाल प्रवेशमा रोक लगाइएको छ ।

गृह मन्त्रालयले यस अघि नै दक्षिण अफ्रिकाबाट आउने यात्रुहरुलाई,अनअराइभल भिसा नदिने अध्यागमन विभागलाई निर्देशन दिएको थियो । दक्षिण अफ्रिकामा भेटिएको कोरोनाको नयाँ भेरियन्ट अहिले विश्वका दुई दर्जन बढी देशमा देखा परिसकेको छ । छिमेकी देश भारतमा पनि ओमिक्रोन भेरियन्टका दुई जना संक्रमित भेटिएको पुष्टि भएको छ ।